INTRUSOS EN LA RED: RUAR E RIR 2 (LOCALIZACIÓN DE MENSAXES)

“AS ESENCIAS DA CIDADE LÉVALAS DENTRO DOS ZAPATOS”

SANTIAGO PAZOS

(CREADOR E COORDINADOR DOS PROXECTOS DE RUAR E RIR)

Se unha mañá do verán de 2015, con “Ruar e rir”, os carballeses espertaban sorprendidos ao ver que as rúas clamaban por ser algo máis que lugares de paso inertes e insensibles recordándolles que mesmo as súas vivencias persoais estaban unidas a eses espazos públicos, se os pasos de peóns se erguían como testemuñas de acontecementos íntimos e colectivos, se a cidade amosaba ser memoria inesquecible, hoxe retomamos esa iniciativa plástica e literaria con enerxía e forzas renovadas.

IMAXE DESEÑADA POR MON LENDOIRO

Desta volta cabe destacar a participación do alumnado de 2º de Bacharelato do IES Alfredo Brañas e de 4º da ESO do IES Monte Neme, así como a colaboración das directivas e profesorado destes centros de ensino. Achega intelectual colectiva que agroma dun proceso creativo onde a complicidade conceptual dende perspectivas pedagóxicas engaden valiosas ensinanzas no eido da socioloxía urbana, da sustentabilidade e da cidadanía participativa. Aspectos que, por outra banda, transcenden a finalidade efémera do propio proxecto implicando a mocidade en iniciativas comunitarias tan necesarias para o seu crecemento como cidadáns de feitos e de dereitos.

ALUMNADO, PROFESORADO E REALIZADORES CO ALCALDE DE CARBALLO

NA PRESENTACIÓN OFICIAL DO PROXECTO

Novas xeracións que precisan de coordenadas claras para aprenderen a convivir e relacionarse con liberdade en espazos públicos vivos que funcionan coma unha pel acoirazada que protexe a que cada un temos por natureza e complementa esoutra que forman familia e amizades. Unha pel que sente e padece, que exerce de guía na nosa andaina vital, sosténdonos e incitándonos a movermos os pés e espelirmos o corpo, convidándonos a ruarmos, a conversarmos, a socializarmos, a sermos parte de un todo social complexo. E penso que esa pel, propia e allea a un tempo, hai que coidala manténdoa limpa e aseada como se da propia casa tratase, tendo sempre en conta que a ocupación individual do espazo público ha de ser por esencia transitoria e respectuosa.

MARÍA MARTICORENA, CRISTINA CASTRO, SANTIAGO PICOS E SANTIAGO PAZOS

NO IES ALFREDO BRAÑAS

Insisto hoxe, con máis ousadía se cabe, por facelo en compañía dunha mocidade dona do presente e do futuro, en que nese empeño de repensarmos a cidade como algo máis que un contedor de casas, negocios e coches, temos a obriga de construír camiños compartidos onde conflúan iniciativas que nos reconcilien coa cara máis amable e humana da cidade, transformando as vías de paso en lugares de convivencia e transmitindo mensaxes que provoquen conversas, reflexións existenciais, ou preguntas que cuestionen a nosa relación co lugar no que vivimos para buscarmos novas fórmulas que nos permitan rachar coa dureza do formigón e sentir que as rúas de Carballo son tan agarimosas como unha aperta amiga.

RUEIRO E LOCALIZACIÓN DE MENSAXES

IES ALFREDO BRAÑAS

PRECAUCIÓN! AQUÍ APRENDEMOS A PENSAR

DEBUXO DE SANTIAGO PICOS

NON VEÑAS CONTAMINANDO, NIN OFF, NIN Á PATA COXA.
AQUÍ PODES VIR ON SOBRE DÚAS RODAS

CONTORNA
DO IES ALFREDO BRAÑAS E DO CEIP FOGAR

RUAR E RIR

AS MIÑAS LIÑAS SERÁN TAN CURTAS OU TAN LONGAS
COMO PEQUENA OU GRANDE SEXA A TÚA FANTASÍA

CON SENTIDIÑO FARÁS SEGURO O CAMIÑO

A LECTURA É O ATALLO CARA Á CULTURA

PARA RUAR, MELLOR ACENDIDO QUE AMORTUXADO

QUEDAS OU VAS DE PASO?

ONDE IRÁS?

NON TE DESENCAMIÑES

ANDA, VAITE, QUE CHEGAS TARDE !

NON QUEDES EN BRANCO, PENSA EN CORES

ANDA A MODO E VAI CON TINO

PARA GOZAR DOS SOÑOS MELLOR ESPERTOS

IES MONTE NEME E CONTORNA

A SAUDADE É COMO A FAME

SE COA BRÉTEMA NON VES SOPRA

SE ES QUEN DE SOÑALO ES QUEN DE FACELO

ACHÉGATE!

AS ESENCIAS DA CIDADE LÉVALAS DENTRO DOS ZAPATOS

SE CAMIÑAS DESNORTADO NON ABORREZAS,
TEN FORZA, BUSCA, QUÉRETE, EMPATIZA, RI
E CHEGARÁS LONXE, LONXE, LONXE

NON TE PERDAS NESTE MEU LABIRINTO DE LIÑAS
PORQUE PARA ESTRELADO ABONDA O CEO