(FIOT 2018)
27 FESTIVAL INTERNACIONAL OUTONO DE TEATRO CARBALLO
MICROTEATRO METRO CUADRADO
POR 15 MINUTOS DE GLORIA
SANTIAGO PAZOS
Este ano veño insistindo no carácter
pedagóxico que ten o FIOT, con iniciativas innovadoras como se pode comprobar
en moitas desas seccións que complementan o programa de sala oficial. No caso
do Certame de Microteatro Metro Cuadrado funciona como un escaparate para
grupos e compañías que precisan de visibilidade, de espazos nos que poder
amosar a súa creatividade.
E que mellor escenario que Carballo para dar
renda solta a esas iniciativas? Diversos establecementos comerciais da vila
préstanse para exercer como pequenos e improvisados teatros onde actores e
público, un pequeno número de espectadores, rompen as barreiras do espazo e
case mesturados participan desa cerimonia tan saudable como é transcender os
significados das mutuas realidades.
Despois dunha criba feita por un xurado
competente, só seis grupos tiveron a sorte de gozar deses 15 minutos de gloria
prometidos.
PREMIO MELLOR ESPECTÁCULO
MOITO MORRO TEATRO, con “A bonequiña”
Lugar: Ganesha Terapias Naturales.
Unha ambientación moi coidada e cunha
dramaturxia compacta e clara. Bonita de ver en conxunto, pola súa factura
estética e pola interesante proposta temática, con mensaxe e reivindicación
social engadida. Para min os mellores deste II Certame de Microteatro, e vese
que o resto do público tamén o considerou así.
PREMIO MELLOR ACTOR
DIEGO M. BUCETA, con “As vacacións máis
longas”
Lugar: Galería de Arte Manolo Eirín.
Danza contemporánea. Ben feita, penso. Ou,
mellor dito, executada con beleza. Pero, sen ser especialista no tema, penso
que repetitiva en exceso. Ten ritmo e unha presentación estética conceptualmente
moi lograda. Non era o meu preferido para ese premio, pero sospeito que a xente
votou polo esforzo.
M+1(TEATRO CIRCO DANZA), con “Mi bici”
Lugar: Cereales Porteiro, SL.
Profesional traballo de clown e circo con
momentos de interacción co público entretidas e divertidas. Tenro e virtuoso,
mais non tanto como para sorprender. Seguramente máis apropiada para facer no programa
de Teatro de rúa no xardín.
HELENA SALGUEIRO, con “Pan”
Lugar: Panadería Ana Mesejo.
Proposta rompedora, alternativa, cunha
actuación bastante salientable. Canta e fai música de percusión cos elementos
da panadaría. Mestura dramatización, folclore tradicional e danza contemporánea
de xeito harmonioso. Quixo contar moito en pouco tempo e iso desluciu un pouco
a súa participación. Sen dúbida ten un futuro prometedor. Era a miña aposta
como mellor actriz.
FAUNOS, con “Antes que nada”
Lugar: Corredor do Pazo da cultura.
Van directos ao corazón, a parte sensible
do espectador. A enfermidade, a compaixón, o amor por riba de calquera
circunstancia. A proposta é boa, mais a representación dos actores non tivo a
capacidade suficiente de transmitir todo iso que se intuía. Precisan de
recorrido para que o espectáculo adquira peso.
TUKUMPÁS TEATRO, con “A historia das
flores”
Lugar: Floraría Taibo.
Son bos e con ideas interesantes. Desta
volta non chegaron ao nivel que nos amosaron o ano pasado, cando gañaron como
actores e como espectáculo. Unha ambientación decadente para contar unha
historia de amor e vida moi sinxela e tenra con música en directo. Mais penso
que se perden en excesivos prolegómenos en vez de ir ao concreto, a sacarlle
partido a un idea clara e concisa.
Saúde y larga vida…
